Thozi Ngeju’s Blog

Halala Nyakandini!

Fri, 10 Dec 2010 09:22:55 +0200

Lonyaka ubunomdla kakhulu kum. Eyona nto iwenze wanjalo, nangaphezulu kunezinye ndiwuqale ndisebenza nezikolo ezintathu kuphela (iNathaniel Nyaluza High School, iMary Waters Hoer Skool kunye, ngokungamandla, neBenjamin Mahlasela Secondary School). Kodwa ithe ifika inyanga yenKanga ndabe sendisebenza nothotho lwezinye izikolo. Oko ke sinokubulela kumlingane wethu i-Upstart Youth Newspaper.

Ibe ngumngeni into yokusebenzisana noonomgqushwana bamabanga aphantsi ngoba abanelanga ukuba bancinane nje kunabakumabanga aphezulwana, koko balindeleke ukuba imiqondo yabo ayikaphuhlisisi. Ibe ngumnqa ke
ukufumanisa ukuba ibe kwangabo abebenceda aba badala xa beceliwe.

Ngexesha lenkomfa ekuthiwa yiHighway Africa ngenyanga kaCanzibe ndazasa ngo-awareNet, iqonga lethu lonxibelelwano kubantu ebebengasayi kuze bazi ngalo. Eliqela lakwa-Upstart kunye nomnye umfundi ekuthiwa
nguSanele Ntsingana ofunda eNathaniel Nyaluza High School banceda kakhulu. Kodwa ndifuna ukugxininisa ukuzisola kwam ngokuphoxa iqela lakwa-awareNet ngelixesha.

Kanti nangexesha le-National Schools Festival, kwangalenyanga kaCanzibe, ndisebenze nabafundi abavela kwiindawo ngeendawo. Nangona ke kungekho themba lokuphinda sidibane nabo.

Abanye abantu abanomdla uMbutho Loluntu Welali osebenze nabo ibe ngabo bathabatha inxaxheba kwizifundo zokuphuhlisa ubufundisi-ntsapho babo ekuthiwa yi-ACE Course (Advanced Certificate in Education). Bathi
bakuwufumana owona mxholo ka-awareNet babuyela apho baxilonga khona bayokushumayela levangeli. Akuzange kube lula ke kwabanye babo ngoba babengenazo izixhobo ezifanelekileyo. Kodwa ke bazama, ndingatsho
ukuba ngaphandle kwabo u-awareNet ngengekho kulendawo akuyo ngoku.

Iqela loMbutho Loluntu Welali kuyafuneka libulelwe nalo. Baye banyanzeleka ukuba benze uqeqesho olungaphezulu kolo bebelulindile. Siqale kumnumzana uRon Wertlen obesoloko endibonisa ngobucukubhode bobunzulu-lwazi be-computer. Kubekho nonkosikazi u-Anna Wertlen
obesoloko endijongile ukuba andiphumanga emgaqweni yaye andilisebenziseli ebudengeni ixesha lomsebenzi. Owokugqibela nguRichard Strickland obesoloko ejongene nezonto zifuna ukulungiswa kubucukubhode buka-awareNet. Enkosini maqela.

Bafundi! Qaphelani

Wed, 27 Oct 2010 10:12:34 +0200

Ndikhulele ezilokishini ngexesha elinzima lee-80’s kwaye ngeloxesha indlela ekuphela kwayo yokulola ingqondo ibikukuya kumathala eencwadi - ebesingawasebenzisi sonke, ndingagqibezela ngelitshoyo. Kwakufuneka ube ngumntu ongakhathaliyo, ngohlobo oluthile, ukuze ungayikhathaleli into ethethwayo ngawe ukuba ungumntu othanda iincwadi. Kwezintsuku ulutsha lunamathuba amaninzi kakhulu. Kungoko ke ndinobukhwele ngamathuba amaninzi ulutsha lwangoku olunawo. Kuba lusizi ngakumbi xa abanye bolutsha becinga ukuba ukuzinxulumanisa nezinto eziphuhlisa ingqondo yinkcitha xesha.

Kukho i-website ekungafuneki nina, lutsha, ningayiphosi; ibizwa ngokuba ngu-awareNet. u-awareNet lo yinkqubo yonxibelelwano efana nalento kuthiwa ngu-facebook kodwa kukhuselekile ukuyisebenzisa kwaye yenzelwe iMpuma-Koloni kwaye ilapha eRhini. Nto leyo ethetha ukuthi ayidli mthamo we-internet kumagumbi ezifundo. Kuyafana, umzekelo; nokuya kwi-website yaseRhodes.

Kule-website abantu abatsha bayakwazi ukuvula amatyala. Oko kwenza bakwaszi ukubhala ngabo, bafake imifanekiso yabo, bangenele (okanye) benze amahlelo, ukwenza abahlobo (apha ekuhlaleni, kwiphondo, kanti naphesheya), bakwazi nokuncokola nabanye, njalo-njalo.

Abantu abasebenza ku-awareNet baxakekile besenza nezikolo zephondo lweMpuma-Koloni: i-Zwelenqaba SSS, i-Tafalehashe JSS, i-Kwantshunqe JSS neBafazi JSS kulendawo kwakusakuthiwa kuPhesheya kweNciba, kunye
neqela lezikolo apha eRhini.

Le-website ijoliswe, kakhulu, kubafundi. Kodwa ke, ukuba niliqela labantu abanakho ukufumana i-internet sinakho ukusebenza nani. Eyona nto ikuphela koyifunayo kukusibethela umnxeba size ke thina silandele olonxibelelwano. Kwakhona, cinga ukuba bangathabatheka kanjani abahlobo bakho xa bekugqibele kudala ngoku uthi gqi sewuncokola nabantu kwisixhotyana esinayo nemifanekiso yakho.

Igalelo akufuneki lidelwe. Kwelilizwe siphila kulo, ukuba nolwazi ngee-computer akuselocham kodwa kubalulekile. Kufuneka nikhumbule ukuba bekungekudala ngoko ungenakukwazi ukufumana umsebenzi ukuba uthetha kuphela ulwimi lwakho. Kwezintsuku kuya kuba yimfuneko ukuba ukwazi ukuqhuba yaye wazi okuthile ngokucofa amaqhosha.

Ubunzima bokungaxatyiswa

Wed, 29 Sep 2010 12:33:28 +0200

Kuluvuyo ukufumanisa abafundisi-ntsapho bezisebenzisa ii-computer centre ezikhoyo ezikolweni. Ibingazokubanamsebenzi ukuba bazisebenzisa entweni na – ukuba bekungaphazamiseki izinto ezininzi.

Ngeny’ imini ndicelwa ngabahlohli besinye sezikolo endisebenza nazo ukuba mandibancedise baqhagamishelane ne-network yesikolo ye-internet.
Okuphazamisayo apha kukuba bandicela oku ngelixa ndilungiselela ukuqala umsebenzi nabafundi. Nangaphezulu koko, abazihluphi ngokusishiya sedwa nabafundi. Nto leyo ethetha ukuthi abakhathali kakhulu ukuba siyaphazamiseka na. Ngamanye amaxesha ababahlohli bafuna
ukuncokola logama sisebenza. Oko ke kutheth’ ukuthi abandihloniphanga yaye abanaxhala lokuba ndinento endinokuyenza ukuze bangaphazamisi.

Ngeny’ imini eBenjamin Mahlasela Secondary School ndabanentloni xa omnye utitshala ethuka abafundi ababini abasebeza into angazange ayithande. Eyona nto yenza intloni kukuba ababafundi baziphendulela ngamazwi arhwexayo, bekwekwa, de utitshala wanyanzeleka ukuba
makaphume.

Kwakutheni ukuba makabe kwi-computer centre kanye ngelixa ndisebenza nabafundi? Ubenokulinda de ndigqibe kuqala! Masiyibeke ngeny’ indlela: utitshala ulithatha phi ilungelo lokuthuka kumfundi? Asiyo-‘verbal abuse’ leyo?

Ibonisa ukunqaba kwembeko xa umfundi enokuphendula kutitshala – ibembi ke xa ebhekisa intetho erhabaxa. Kodwa ke okwam ayikokugxeka, kukusa ulwazi ngo-awareNet ezikolweni.

Kungumnqa ke oku, ngoba kwamanye amazwe abahlohli bayaluthakazelela uncedo oluvela ngaphandle (ngokungakumbi oluvela kwii-NGOs), ngoba oku kongeza umxhelo kubafundi nangaphezulu kunika abafundi iingcinga
nobuchule bokucinga. Kukho iqela elinjalo ekuthiwa yi- Ubumi abasebenza eFrance. Kungoko ke isebe lezemfundo bekumele liyichuluncele into enje ngezandla ezingenamikhinqi.

Belimnandi ikhefu lenyanga yesilimela

Sat, 31 Jul 2010 10:53:07 +0200

Kumnandi ukusebenza nabantu xa ucinga ngegalelo umsebenzi lowo owenzayo kumphakathi.

Ngelixesha abanye abantu bebexakekile ne-FIFA Soccer World Cup, mna bendiququzela ndincedisana nabafundi, ndibaqhelanisa ne-awareNet. Ababafundi bawuthande kakhulu umsebenzi wabo. Lonto indikhumbuza ngento ethethwe ngomnye wabafundi kum xa ndibaxelela ukuba amapasi abo okusebenzisa ii-computer zeziko eliphezule lemfundo iRhodes ebewafumana kwi-IT Division yakhona. Lomfundi uthe: “Kazi sakuba yintoni ngaphandle ko-awareNet, ngoba ngoku siyakwazi ukwabelana ngambacebo emoyeni ngomsebenzi wesikolo.”

Enyanisweni wena ukuba izikolo zababafundi zinawo amagumbi ee-computer baskwazi ukusebenzisa u-awareNet. Owona mxholo wokuba esisicatshulwa sindichukumise kukuba kucacile ukuba abafundi sebeqalisile ukunxulumana nabanye bezinye izikolo.

Kubenomdla ukuhlanganisa abafundi abadala nabancinane ndawonye ngoba ndiyendakwazi ukujonga indlela abahlomla ngayo. Kuyothusa ukuthi ababancinane bebengoyiki ukubuza – mhlawumbi kuba besazi ukuba
kulindeleke oko kubo. Ababadala bona bebethule ixesha elininzi. Ukuba bendingengomntu uhlala ajikeleze phakathi kwabo ukuqinisekisa ukuba bamamele bendingakuyazi ukuba abanye babo baxakiwe.

Umbhiyozo kazwelonke wezikolo (The National Schools Festival) nawo unike umdla kum. Okokuqala, ndiye ndacelwa ukuba mandiphe izifundo ebendizenza isihloko esinomtsalane ngokungaphandle ko-awareNet. Ndiye
ndathi makuthiwe yi-‘Intelligent Fingers’. Ekuqaleni kwesifundo ngasinye bendikucacisa oku ngokuthi iminwe yethu yenza yonke into kulemihla. Sithenga kwi-internet, senza imiqhafazo (SMSs okanye ii-emails). Nkqu neemvavanyo (interviews) sizenza kwinto ekuthiwa yi-Skype.

Ude wathi uGareth Jones omnye obethabatha inxaxheba kulombhiyozo kazwelonke wezikolo: “Amaqonga afana no-awareNet ayanceda ekuloleni ubukhali beengqondo zabafundi.”

“Websites like awareNet help sharpen learners intellects.” By (one participant during National Schools Festival)"

Yintoni Kanen’ Uxolo?

Thu, 1 Apr 2010 10:54:02 +0200

Wonkumnt’ uyaluthand’ uxolo. Lusisixhobo kubomi babantu ngoba lubenza baphile ngolonwabo nangesiqhelo. Ngoxolo, iingxaki zisonjululwa ngaphandle kwegazi. Izimvo azibuhlungiswanga yaye akukho koyikisana. Kodwa abantu baphelelwa ngumonde wokuzama uxolo ngoba kunzima ukulufumana. Kuthabatha nethuba elide ukulufeza. Kanti, uxolo lufuna ukuba abantu bazidanele izenzo zabo ezigwenxa, bazithobe. Lufuna ukuba bavume ‘kubachasi babo’ ukuba bebephazamile, kanti abantu banolunya ukuba bangazifaka kwezozimvo.

Kucacile ke ukuba ulunya sisixhobo semfazwe. Lubenza abantu babeneentloni zokuthi, “ndicela uxolo” okanye “bendiphazamile”. Ngako oko bankaniza ngokuqhubeka ngokwandisa uxambuliswano. Bayayazi ukuba oko kungakhokelela emlweni, kodwa kuba bezithembile ngokuba bayakwazi ukulwa, abakhathali, “makube njalo,” banokusuke babe batsho.

Ngumnqa ke lo ngoba akukho mntu ukuthanday’ ukulwa, okanye ukuxabana, okanye ukuba semfazweni. Ngemfazwe nokulwa, kufumaneka imfumba yomonakalo. Umzekelo, izakhiwo ezixabisayo ziyonakaliswa emfazweni – kwa izixhobo ezisetyenziswayo ziyaxabisa. Ngaphezu koko, ubomi buyalahleka. Kodwa lona uxolo: lukukubhekiswa nje kwamagama, ukuzithoba, kunye nokuzeyisa. Akukho mntu ufayo. Akukho mhlaba kunye nezakhiwo ezonakalayo. Akukho phalalo-gazi.

Kanti, uyayazi, xa yonke into isonjululwe sinakho ukubulisana xa sidibana; sibambane nezandla sibe zizihlobo. Ivakala kamnandi! Iimfuno zethu zingade zibe azifezekanga, kodwa kananjalo asiphulukananga nezinto ezininzi – yaye singabe sisezizihlobo, hayi iintshaba. Singacelana uncedo.

Kanti ukuba besilwile, besizakube sisenenqala sisabawela okanye sicwangcisa impindezelo. Ngeny’ indlela, emveni kwemfazwe nokulwa, ekugqibeleni siyanyanzeleka sethethe, ngoba sakuphela sisilwa unaphakade, yaye silwela into engekhoyo. Wonke umntu olwayo, unyanzeleka ayilungise into ngokuthetha ekugqibeleni – ehlalutya ukuba
bekonakele phi; ngoba; nokuba kufuneka athini ke ngoku. Bekufuneka bebethethile kwasekuqaleni. Lonto biyakubakhusela kwintlungu eninzi. Ndifun’ ukuthi, basombulula imeko – enkosi – kodwa banamanxeba
ekufuneka bawanyange, izinto ezonakeleyo, njalo-njalo, ebengenakuba nazo ukuba bebeqale ngokuthetha-thethana kwakwindawo yokuqala.

Into ethetha ukuthi, uxolo luyingangamsha, lufundile, lucocekile lwaye alunagazi. Ukuba abantu bebenokuginya nje amakratshi abo bangabi nankani, bamamele ingqiqo, yaye bazithobe, kwaye bakumele ukuzeyisa bazibone iindleko ezenziwa yimfazwe besizakuba nehlabathi elingcono.